Tiranë, 18 maj NOA - Kandidatja për postin e kryetarit të PD-së, dega Tiranë, Lajla Përnaska, u shpreh sot në punimet e Konferencës së kësaj dege, se "me platformën tonë elektorale ne do të certifikojmë edhe një herë fitoren e madhe të zgjedhjeve të vitit 2005, e cila do t' i shërbejë jo vetëm kryeqytetit, por gjithë Shqipërisë".
Në fjalën e saj Përnaska, konkurrente në garën për kreun e PD-së së Tiranës, tha se "maxhoranca ka qartazi një aksion për qytetarët dhe zhvillimin e vendit. Por, nga ana tjetër ka një tjetër model qeverisje për Tiranën, bazë e së cilës është pasioni për pushtet i Edi Ramës, pasioni për kapitale marramendëse dhe për uzurpim të opinionit publik dhe mediave". "Rama tashmë është përfshirë nga fobia e zgjedhjeve të qershorit, prandaj kërkon të baltosë në çdo vend dhe media progresin e këtij vendi" shtoi më tej Përnaska. Ajo theksoi se "me PD-në e Tiranës maxhoranca do t'i çojë më tej arritjet, për ta bërë degën e kryeqytetit forcën që ne duam".
Përnaska bëri thirrje për t'i dhënë Tiranës, "modelin e munguar, nga një model qeverisje me bojatisje, betonim e abuzime që është sot, në një qytet që do të shpalosë gjithë potencialin e zhvillimit dhe vlerave të përbashkëta".
k.k/NOA
