Tiranë, 17 qershor NOA - "Marubi" sërish protesta, kësaj here protestuesit kanë bllokuar hyrjen e Bashkisë së Tiranës.
"Aleanca për Hapësirën Publike, Akademia e Filmit dhe Multimedias Marubi, Shoqata e Kineastëve Shqiptarë "Lumiere", kineastë, studentë, pedagogë të universiteteve publike e private, gazetarë, aktivistë të shoqërisë civile dhe përfaqësuesit e Familjes Hysa (pronarët legjitim) bllokuan për më shumë se 45 min hyrjen e Bashkisë Tiranë për të protestuar mbi ngjarjet e turpshme që po ndodhin që prej 121 ditësh pranë Akademisë së vetme të Filmit dhe Multimedias "MARUBI" në Shqipëri" thuhej në deklaratën e lëshuar nga përfaqësuesit e protestuesve.
Protesta u përshkallëzua duke qenë se Bashkia Tiranë, sipas protestuesve është përgjegjësja kryesore për indiferencën e treguar gjatë javëve të fundit në lidhje me prishjen dhe prerjen e ullinjve 100 vjecarë pranë parqeve në krah dhe përpara Akademisë Marubi.
Folësit në protestë deklaruan se nuk do të tolerohet asnjë veprim i mëtejshëm për prerjen e pemëve dhe betonizimin e parqeve të vetme të mbetura në ish kinostudio si dhe në rast të kundërt protesta do të përshkallëzohet duke i kërkuar të gjithë qytetarëve shqiptarë të mbrojnë më çfarëdo lloj mjeti hapësirat publike por mbi të gjitha hapësirat që mbartin kujtesën historike.
k.k/NOA
