Tiranë, 20 korrik NOA - Kryeministri, Sali Berisha priti sot në një takim përfaqësuesen e Fondit Monetar për Shqipërinë, Ann-Margret Westin me rastin e largimit të saj, pas përfundimit të misionit të FMN-së në Shqipëri.
Kryeministri Berisha e falënderoi Ann- Margret Westin për bashkëpunimin ndërmjet Fondit Monetar Ndërkombëtar dhe qeverisë shqiptare, si dhe për kontributin e dhënë nga FMN-ja në zbatimin e reformave të gjithanshme dhe të suksesshme të ndërmarra nga kjo qeveri.
Me tej, Berisha e siguroi Westin se në këtë fazë të dytë të bashkëpunimit me FMN-në, sipas Artikullit 4, qeveria shqiptare është përsëri shumë e hapur dhe bashkëpunuese me këtë institucion për të çuar përpara reformat e nisura, si dhe shumë të tjera.
Nga ana e saj, përfaqësuesja e Fondit Monetar Ndërkombëtar për Shqipërinë e falënderoi kryeministrin për mbështetjen e dhënë dhe për bashkëpunimin dypalësh me qeverinë shqiptare.
Më tej, Westin u shpreh se po largohej nga Shqipëria me mbresa shumë të mira nga të gjitha pikëpamjet dhe se Fondi Monetar Ndërkombëtar është i hapur për bashkëpunim të mëtejshëm me qeverinë shqiptare.
k.k/NOA
