Ohër, 7 shtator NOA-Aksioni për tërheqjen e anijes "Ilinden" e cila pardje u fundos në Liqenin e Ohrit dhe me vete mori 15 jetë, me siguri nuk do të kryhet edhe sot.
Ekspertët e mbërritur nga Bullgaria dhe Kroacia për verifikimin e shkaqeve të fatkeqësisë kanë kërkuar që të përsëritet xhirimi nënujor i "Ilindenit", pasi xhirimet e bëra më parë nuk i janë përgjigjur kërkesave të hetimit.
Kushtet klimatike në Ohër janë të ngjashme me të djeshmet, të cilat u theksuan nga ekspertët si të pavolitshme për një aksion të këtillë për tërheqjen e "Ilindenit" nga bregu.
E gjithë flota e anijes në Liqenin e Ohrit edhe gjatë mëngjesit të sotëm është ankoruar në Portin e qytetit.
Nëpër liqen pothuajse nuk ka qarkullim, përveç varkave patrulluese të policisë dhe objekteve lundruese të përfshira në hetim për fatkeqësinë e madhe.
