Tiranë, 5 tetor NOA-Ministri i Drejtësisë Bujar Nishani vendosi sot shkarkimin nga detyra të Regjistrueses së Tiranës, Dorina Stringa
Shkarkimi u bë me propozim nga Zyra Qendrore e Regjistrimit të Pasurive të Paluajtshme, pas një kontrolli 2-mujor të ushtruar në Hipotekën e Tiranës nga ana e Sektorit të Kontrollit Tekniko Ligjor.Objekt i këtij kontrolli ishte respektimi i procedurave administrative dhe shërbimit ndaj qytetarit nga ana e punonjësve të kësaj Zyre.
Në fund, kontrolli konstatoi shkelje të shumta të procedurave administrative dhe vonesa të mëdha në shërbimin ndaj qytetarëve nga ana e Regjistrueses, Dorina Stringa dhe nga 10 punonjësit e tjerë.
Bazuar mbi raportin e Kontrollit Tekniko Ligjor, Qirjako i propozoi Ministrit të Drejtësisë shkarkimin nga detyra të Regjistrueses së Tiranës, Dorina Stringa.
Zyra Qendrore e Regjistrimit të Pasurive të Paluajtshme do të vazhdojë kontrolle edhe në Zyrat e tjera Vendore të Regjistrimit të Pasurive të Paluajtshme.
