 Prishtinë, 14 tetor NOA-Presidenti Fatmir Sejdiu dhe kryeministri Hashim Thaçi kanë zhvilluar një takim me një delegacion nga Mbretëria e Bashkuar.
Të dy liderët kanë theksuar se pas shpalljes së pavarësisë dhe me ndërtimin e institucioneve të saj, Kosova është shndërruar në faktor stabiliteti për paqen dhe stabilitetin në rajon dhe tashmë është fokusuar në procesin e integrimit në Bashkimin Evropian dhe në NATO.
Shefi i delegacionit të Komisionit për Marrëdhënie me Jashtë të Parlamentit të Mbretërisë se Bashkuar, John Stanley ka theksuar se ka mbetur i mahnitur nga gatishmëria e kosovarëve për t'i përmbushur standardet e kërkuara për liritë dhe të drejtat e njeriut. Lidhur me çështjen për procesin e lobimit për njohjen e pavarësisë së Kosovës nga sa më shume vende të botës, Sir John Stanley ritheksoi vendosmërinë e Britanisë së Madhe për ta ndihmuar vendin tonë edhe më tej në këtë proces të rëndësishëm.
