Krujë, 15 tetor NOA - Një "xing" me makina ka pasuar me një debat mes dy personave tre ditë më parë në Krujë, ndërsa ditën e sotme njëri prej tyre dyshohet se është hakmarrë duke i zënë pritë me qëllim për të vrarë.
Atentati ndodhi ditën e sotme kur 40-vjeçari, Petrit Bafti ka qenë duke udhëtuar në drejtim të Laçit, në rrugën e vjetër Thumanë-Laç, në dalje të qendrës së Thumanës, kur një person që udhëtonte me një automjet tip-Benz i ka prerë rrugën dhe më pas e ka qëlluar dy herë me pistoletë.
Bafti ka rënë menjëherë mbi timon ndërsa autori u largua me shpejtësi për t'i shpëtuar prangave të policisë.
40-vjeçari i plagosur u transportua menjëherë në spital nga ku mësohet se ndodhet në gjendje kritike për jetën ndërsa, policia nisi hetimet për të identifikuar autorin e ngjarjes.
Burime nga policia thanë se Bafti tre ditë më parë është përplasur me një makinë dhe për pasojë ka pasur një debat me drejtuesin e makinës.
Dyshohet se personi me të cilin 40-vjeçari ka debatuar tre ditë më parë, të ketë marrë hakë duke i prerë rrugën sot me qëllim për ta vrarë,
Megjithatë burimet policore shtuan se hetimet po vazhdojnë për të zbardhur me saktësi rrethanat e kësaj ngjarjeje.
k.k/NOA
