Chieti, 25 Dhjetor NOA - Policia italiane arrestoi dy emigrantë shqiptarë të akuzuar për trafik droge dhe gjykata lokale në Chieti dha sot masën e sigurisë së arrestit me burg deri në përfundim të hetimit. Korrespondentja e agjencisë NOA informon se dy shqiptarët e prangosur janë Ardian Kovaçi 35 vjeç dhe Erion Zoga 39 vjeç.
Ata u kapën me 23 kilogramë lëndë narkotike e llojit marijuanë, në një operacion që u organizua nga forcat speciale të antidrogës.
Policia pranoi se aksioni erdhi pas shumë sinjaleve që kishin marrë për dy shqiptarët ndaj dhe u vu në ndjekje të tyre duke arritur t'i kapë me sasinë e drogës, e cila ishte ndarë në 23 pako të cilat të dyshuarit pranuan se ishin gati për tu shitur.
Policia tha se vlera e shitjes me shumicë e drogës së sekuestruar ishte prej jo më pak se 18 mijë eurosh.
Gjatë këtij operacioni u morën në pyetje dhe dy të dyshuar të tjerë njëri prej tyre ishte shqiptar ndërsa tjetri italian por pas kontrollit që iu bë nuk u mor asnjë masë ndëshkimore pasi nuk u gjet ndonjë provë implikuese.
Ndërsa për sa i përket dy të arrestuarve ato do të përballen përpara trupit gjykues me akuzën e mbajtjes dhe shpërndarjes të lëndëve narkotike.
r.bNOA
