Tiranë, 13 janar, NOA - Në bazë të detyrave të përcaktuara në mbledhjen e fundit të Komitetit Ndërministror të Emergjencës Civile, ditën e sotme do të realizohen disa veprime dhe operacione nga strukturat e angazhuara për përballimin e emergjencës në zonat e prekura nga përmbytja në qarkun e Shkodrës. Raportimi përkatës i ministrisë së Brendshme bën me dijeni se konkretisht, specialistët italianë për digat do të transportohen nga Tirana për në zonat e prekura nga përmbytja.
Sikundër parashikohen fluturime të posaçme më komunën Velipojë për të transportuar ushqim për bagëtinë, ujë në sasinë prej 6 ton, ushqim me 500 pako si edhe 4000 thasë për argjinaturën e Reçit.
Kurse në komunën Bërdicë sipas këtij plani masash do të dërgohen 4 ton koncentrate për bagëtinë.
Në komunën Bushat do të dërgohen 4 gjeneratorë me fuqi 4.5 KV si dhe minimalisht 100 litra karburant, por edhe 1 lundër me motor.
Nga ana tjetër, në komunën e Dajçit do të kryhet një fluturim për të çuar ushqim për bagëtinë, 6 ton ujë si edhe 40 pako ushqimore në fshatin Darragjat.
Sa i përket bashkisë së Shkodrës atje do të dërgohen 2 mjete ushtarake për ndarjen e 5 ton koncentrate për kafshët si edhe 100 pako ushqimore për zonën e Bahçallëkur,
Në fund, në komunën Rrethinë do të dërgohen 80 pako ushqimore dhe 2 ton koncentrat, si dhe 4 ton të tjerë në komunën Ana e Malit. n.e/NOA