Prishtinë, 28 janar, NOA - Kosova nuk është një rajon për të cilin Shtetet e Bashkuara të Amerikës do të mbështesin ndarjen apo ndonjë skenar të jashtëzakonshëm ndaj tij. Një fakt të tillë e ka pohuar gjatë një interviste, zv/ndihmës sekretari amerikan i Shtetit, Stuart Jones. Sipas tij, Shtetet e Bashkuara e kanë njohur pavarësinë e Kosovës dhe janë të angazhuara në integritetin e saj territorial.
Më tej, Jones ka vënë në dukje faktin se Shtetet e Bashkuara mbështesin integrimin e veriut në institucionet e Kosovës dhe janë të mendimit se është e rëndësishme për Prishtinën ta bëjë popullatën serbe që jeton në pjesën veriore të Kosovës të ndihet pjesë e saj dhe të investojë në prosperitetin e kësaj republike të re.
Sipas zv/ndihmës-sekretarit amerikan të Shtetit, paraqitet gjithashtu në interes të Beogradit, që të punojë me njerëzit që jetojnë në atë rajon të gjejnë zgjidhje praktike për të përmirësuar standardin e tyre për një jetë më të begatë.
n.e/NOA
