Prishtinë, 19 shkurt, NOA - Komisionerja e Bashkimit Evropian për politikën e Jashtme, Katerina Ashton, do të mbërrijë sot për herë të parë për një vizitë zyrtare në Kosove si pjesë e turit të saj në Ballkanin Perëndimor. Bëhet me dijeni se gjatë qëndrimit të saj në këtë vend, ajo do të zhvillojë biseda me udhëheqësit e misionit evropian EULEX, të Zyrës Civile Ndërkombëtare, me përfaqësues të Komisionit Evropian si edhe me kryeministrin kosovar, Hashim Thaçi.
Gjatë qëndrimit të djeshëm në Bosnjë-Hercegovinë, ajo bëri me dijeni faktin se Bashkimi Evropian dëshiron të ndihmojë Bosnjë-Hercegovinën dhe Serbinë në rrugën e tyre për një afrim të mëtejshëm.
"E ardhmja e Bosnjës multi-etnike është në BE", - tha ajo pas takimit me kryeministrin Nikola Spiric.
Ndërsa gjatë qëndrimit në Beograd, ajo paralajmëroi një bashkëpunim më të mirë me Gjykatën e Hagës për krime lufte.
n.e/NOA
