Tiranë, 20 shkurt, NOA - Dy persona me 33 320 euro falso janë arrestuar sot nga policia e kryeqytetit.
Policia bënë të ditur se, Skënder Selim Buçpapaj dhe Entela Hasan Dardha, janë arrestuar pak orë më parë në kuadër të operacionit të koduar "Euro Mat". Të gjitha kartëmonedhat e gjetura dy të arrestuarve janë të prerjes 20 euro. Sipas policisë kjo është një nga sasitë më të mëdha të sekuestruara.
Arrestimi i tyre u bë pas një investigimi disa mujor. Këta shtetas u kapën në flagrancë teksa po tentonin të këmbenin një shumë të konsiderueshme kartëmonedhash euro false.
Por veç kartëmonedhave të sekuestruara, policia deklaron se dy të arrestuarve u është kapur dhe një sasi lëndë narkotike e dyshuar heroinë.
Mbajtja e drogës, sipas policisë mendohet të jetë për përdorim dhe qese e mostra për shitje ne treg.
Gjithashtu, Buçpapajt dhe Dardhës i janë sekuestruar dhe dy vula të falsifikuara të shoqërive tregtare, 6 telefona celularë, si dhe një makine tip BMV me targë TR 2729 F.
"Nga hetimet ka rezultuar se këta dy shtetas janë pjesë e një rrjeti të trafikut ndërkombëtar të eurove të falsifikuara dhe drogës. Vazhdojnë hetimet për zbulimin e personave të tjerë të implikuar", thuhet në njoftimin e policisë.
m.xh/NOA
