Tiranë, 2 mars, NOA - Konferenca e Kryetarëve mblidhet sot për të diskutuar mbi propozimet ligjore të dorëzuara disa ditë më parë në Kuvend nga deputetët e Partisë Socialiste për krijimin e një komisioni hetimor parlamentar për zgjedhjet e 28 qershorit.
Lidhur me një mbledhje të tillë, dje kryetarja e Kuvendit, Jozefina Topalli i ka shkruar madje një letër kreu të PS-së, Edi Rama, me anë të së cilës i ka kërkuar atij që të paraqesë kreun e grupit parlamentar socialist.
"Vendimi për thirrjen e mbledhjes së Konferencës së Kryetarëve të grupeve parlamentare, është bërë mbi bazën e nenit 7, të ligjit nr.8891, datë 2.5.2002, "për organizimin dhe funksionimin e Komisioneve hetimore te Kuvendit", thuhet në këtë letër.
Duke i sqaruar më tej Ramës se sipas nenit 12 të rregullores së Kuvendit, Konferenca e kryetarëve përbëhet ng kryetarët e grupeve parlamentare të Kuvendit.
E në të tilla kushte, sipas Topallit, është e domosdoshme paraqitja në mbledhjen e sotme e përfaqësuesit socialist.
n.e/NOA
