Ministrat Hyseni dhe Miloshoski vlerësuan lart marrëdhëniet mes Kosovës dhe Maqedonisë
Prishtinë, 15 mars NOA - Ministri i Punëve të Jashtme i Kosovës, Skënder Hyseni ka pritur sot, ministrin e Jashtëm të Maqedonisë, Antonio MiloÅ¡oski, i cili po zhvillon vizitë njëditore në Prishtinë.
Gjatë takimit, i cili ishte miqësor dhe mjaft përmbajtësor, dy ministrat e Jashtëm diskutuan dhe u dakorduan për tema të ndryshme, të cilat kishin në fokus marrëdhëniet e shkëlqyera mes dy vendeve tona, si dhe perspektivën e përbashkët evropiane.
Ndërsa vlerësuan lart marrëdhëniet mes Kosovës dhe Maqedonisë, ministrat Hyseni dhe Miloshoski, biseduan gjatë edhe për thellimin e bashkëpunimit bilateral në fusha të ndryshme.
Në këtë kuadër, ministri Miloshoski, premtoi se Maqedonia mund të ndajë dhe t'i japë Kosovës, përvojën dhe ekspertizën e saj për sa i përket plotësimit të standardeve që kërkohen për liberalizimin e vizave.
Duke iu referuar faktit se, procesi i liberalizimit të vizave është një proces teknik dhe jo politik, ministri Hyseni nga ana e tij potencoi faktin se Kosova është e gatshme dhe në pritje të udhërrëfyesit për liberalizimin e vizave.
Temë e bisedës mes ministrave Hyseni dhe MiloÅ¡oski ishte edhe perspektiva e përbashkët evropiane e vendeve të Ballkanit Perëndimor, për çka, ministri Hyseni potencoi edhe një herë se Bashkimi Evropian nuk do të jetë i plotë pa integrimin e të shtatë vendet e Ballkanit Perëndimor.
Gjatë bisedës, gjithashtu u fol edhe për integrimet ndërballkanike si dhe për domosdoshmërinë e politikave të fqinjësisë së mirë, të cilat janë faktor paqeje dhe stabiliteti në rajon.
Ndërkaq, ministri Hyseni e ka falënderuar homologun e tij maqedonas për mbështetjen që Maqedonia i ka dhënë Kosovës, pas shpalljes së pavarësisë.
a.b/NOA
