Gjirokastër, 31 mars, NOA - Pesë studentë të universitetit "Eqrem Çabej" në Gjirokastër kanë rënë në prangat e policisë, pasi u kapën në flagrancë duke pirë cigare me lëndë narkotike hashash.
Ndërkaq, gjatë kontrollit të ushtruar në dhomën e tyre të konviktit, në afërsi të dritares u gjet një sasi e dyshuar si lëndë narkotike, e mbështjellë me plasmas transparent që peshonte 11.2 gramë.
Lajmi bëhet me dijeni nga burimet policore të Gjirokastrës, sipas të cilave, të ndaluarit mësohet se janë studentët me inicialet E.E, 25-vjeç, lindur dhe banues në Mallakastër; M.B, 22-vjeç, lindur dhe banues në Berat; M.R, 21-vjeç, lindur dhe banues në Tiranë; R.S, lindur dhe banues në Mallakastër dhe M.M, 22-vjeç, lindur dhe banues në Përmet.
Arrestimi i tyre u bë për veprën penale të "Prodhim dhe shitje të narkotikëve", parashikuar nga neni 283/2 i Kodit Penal, ndërsa po vazhdon puna nga ana jonë për kapjen e personave të cilët kanë shpërndarë këtë lëndë narkotike në konvikt.
n.e/NOA
