Elbasan: Arrestohen Dy Shtetas, Prodhonin Mallra Ushqimore Të Jashtligjshme
ELBASAN, 27 Maj /ATSH-Miranda Sadiku/- Dy persona janë arrestuar të enjten, të dyshuar për prodhim të paligjshëm të mallrave ushqimorë dhe industrialë, bën të ditur policia lokale.
Zëdhënësja e policisë, Valbona Begu, pohon për ATSH se Bledar Shehu 36 vjeç si dhe Shëndet Boçi 51 vjeç akuzohen për veprën penale "prodhim i kundraligjshëm i artikujve dhe mallrave industrialë dhe ushqimore e kryer në bashkëpunim".
Ata kishin instaluar në banesën e Shëndet Boçit një linjë prodhimi sallamerie në gjendje pune, ku nuk disponohej asnjë lloj dokumentacioni, aktivitet ky i cili kryhej prej më shumë se 2 vjetësh.
Policia sekuestroi 2000 kilogram mish të grirë, i llojeve të ndryshme si pulë, gjedhi, që të arrestuarit e përdornin si lëndë të parë për prodhimin e sallameve të ndryshme. Gjithashtu u sekuestruan 600 kg mish i përzier, esenca të ndryshme për prodhim sallami, etiketa sallamesh, të cilat ishin të falsifikuara.
Mësohet se në banesës e Shëndet Boçit u gjetën dhe u sekuestruan 3000 kg pije të ndryshme alkolike e prodhuar në mënyrë artizanale si raki, verë, uthull, etj, të destinuara për treg./ch/
