Uashington, 4 qershor, NOA - Presidenti i Shteteve të Bashkuara, Barak Obama, ka anuluar vizitën e tij në Indonezi dhe Australi, për shkak të katastrofës mjedisore, të shkaktuar nga rrjedhja e naftës në Gjirin e Meksikës, njoftoi Shtëpia e Bardhë.
Obama i ka informuar presidentët e dy vendeve përmes telefonit, duke iu shprehur “keqardhje të thellë”. Vizita është dashur të realizohej nga data 13 deri më 19 qershor.
Indonezia dhe Australia nuk e kanë komentuar deklaratën e Shtëpisë së Bardhë.
Obama sot do të udhëtojë për në Luzianë, ku do të vizitojë vendet e goditura nga fatkeqësia mjedisore dhe kjo do të shënojë vizitën e tij të tretë në këtë zonë, që nga shpërthimi i platformës së naftës që shkaktoi vdekjen e 11 punëtorëve.
NOA
