Shezai Rrokaj, Kandidatura E Dytë Për Kreun E Lsi-Së Së Tiranës
TIRANE, 14 Qershor /ATSH- A.Gegvataj/ - Prof. Dr. Shezai Rrokaj i paraqiti sot Sekretarit të Përgjithshëm të LSI-së, Luan Rama, kandidaturën për drejtues të kësaj partie për qarkun e Tiranës.
Zyra e shtypit e kësaj partie bëri të ditur se gjatë dorëzimit të kërkesës për kandidaturën e tij, Rrokaj kërkoi mbështetjen e anetarësisë së kryesisë për votimin e tij si kryetar i LSI-së për kryeqytetin.
Duke pohuar arsyet që e nxitën për të kandiduar si kryetar i kësaj force politike për Tiranën, Rrokaj tha se " kam një program konkret për LSI si dhe për kryeqytetin".
Ndërsa Sekretari i Përgjithshëm i LSI-së, Luan Rama, e vlerësoi kandidaturën e z.Rrokaj si dinjitoze dhe serioze, pasi sipas tij, "Prof. Dr. Shezai Rrokaj është një intelektual i shquar për LSI e Tiranës".
Kërkesa e Rrokajt për të synuar kreun e LSI për kryeqytetin është dyta pas asaj të paraqitur pak ditë më parë edhe një nga themeluesit e degës së kësaj partie për Tiranën, Prof. Dr. Edmond Panariti./s.s./
