Dita E Komunikimit, Studentët E Gazetarisë Konkurs Për Punimet Më Të Mira
TIRANË, 1 Korrik /ATSH, E.Gjikolli/ - Në ditën e Komunikimit, studentët e Gazetarisë të fakultetit Histori- Filologji në Tiranë, u përballën për herë të parë në një konkurs, me punën e vërtetë si gazetarë, të organizuar të enjten nga Departamenti Gazetarisë në Fakultetin Histori- Filologji.
Ministri i Teknologjisë dhe Inovacionit, Z. Genc Pollo, si dhe Rektori i Universitetit të Tiranës, Dhori Kule, vlerësuan studentët me çmime për punët më të mira të realizuara në atelietë e shtypit, medias televizive, radios dhe kompjuterit.
Prof. Artan Fuga, përgjegjegjësi i Departamentit të Gazetarisë, theksoi rëndësinë e aktiviteteve të tilla , që sipas tij promovojnë arritjet e kësaj dege universitare dhe e bëjnë atë një aktor të rëndësishëm të debatit dhe komunikimit publik.
Duke i përgëzuar studentët, Rektori i Universitetit të Tiranës , Dhori Kule, u shpreh se "punimet janë shumë interesante dhe trajtojnë me shumë ndjenjë e objektivitet një spektër të gjerë problematikash, që sipas tij, ishin të realizuara me cilësi dhe profesionalizëm frymëzues, duke mbartur vërtetësinë e realitetit, por edhe përpjekjet për ta ndryshuar këtë realitet".
Juria, e përbërë nga pedagogë të jashtëm të këtij departamenti, vlerësoi me çmim të parë punimin "Përrallë në kohët moderne"./m.sh/
