Tiranë, 5 korrik, NOA – “Sulmi ndaj deputetit serb Miletiç synon të dëmtojë imazhin e Kosovës”.
Kështu u shpreh sot ministri i Jashtëm, Ilir Meta, ndërsa dënoi sulmin e ndodhur ndaj deputetit serb Miletiç, duke nënkuptuar se sulme të tilla kanë prapavijë politike dhe synojnë të dëmtojnë imazhin e Kosovës përballë ndërkombëtarëve, por edhe imazhin e gjithë rajonit të Ballkanit.
Ministri i Jashtëm, Ilir Meta, riafirmoi mbështetjen e qeverisë shqiptare ndaj shtetit të Kosovës, duke deklaruar se nuk mund të ketë shkëmbime territoresh ndërmjet Kosovës dhe Serbisë, sikundër deklarojnë politikanë të ndryshëm serbë kohët e fundit.
“E ardhmja e Ballkanit nuk është ndryshimi i kufijve, por heqja e kufijve”, theksoi ministri Meta.
“Statusi dhe kufijtë territorialë të Kosovës janë një çështje e pakthyeshme dhe të gjithë duhet të kuptojmë se duke respektuar kufijtë e njëri-tjetrit i afrohemi më shpejt integrimit në BE dhe në të gjitha strukturat e tjera euroatlantike”, nënvizoi kryediplomati shqiptar.
mit/NOA