Tiranë, 16 korrik, NOA – Emrin e prof. dr. Xhavit Gjatës, një nga themeluesit e shërbimit të psikiatrisë në vendin tonë, i shkolluar në Perëndim, në Francë, e mban nga sot spitali i Psikiatrisë në Qendrën Spitalore Universitare “Nënë Tereza”.
Në ceremoni nuk munguan ministri i Shëndetësisë, Petrit Vasili, Shefi i Shërbimit të Psikiatrisë Anastas Suli, si dhe mjekë, kolegë dhe të afërm të mjekut të nderuar.
Me ardhjen në Shqipëri, psikiatri i njohur Xhavit u përpoq të sillte copëza të kësaj kulture në shëndetësinë shqiptare, në spitale, në Fakultetin e Mjekësisë, dhe kudo ku ai shkoi për të dhënë përvojë.
Ministri i Shëndetësisë, Petrit Vasili tha në këtë ceremoni se “Spitali i Psikiatrisë, që sot kryen mbi 1150 shtrime në vit dhe 2500 konsulta, është zhvilluar falë punës së bërë nga mjeku prof. dr. Xhavit Gjata”.
Ministri Vasili e konsideroi veten me fat që ishte pikërisht ai ministri që firmosi vendimin për t’i dhënë spitalit të Psikiatrisë, emrin e profesorit të njohur.
“Do të mbetet një nga kënaqësitë e jashtëzakonshme të punës sime si ministër, sepse mendoj që shumë gjëra vijnë e shkojnë, por këto përjetime që kemi këtu do na shoqërojnë gjatë gjithë jetës”, pohoi ministri.
mit/NOA