Vlorë: Flakët E Zjarrit Djegin 50 Hektarë Shkurre
VLORË, 31 korrik /ATSH-H.Koçi/ - Një vatër zjarri u shfaq mesditën e sotme në zonën e kodrave të Shashicës, që rrethojnë qytetin e Vlorës, në pjesën lindore të tij.
Flakët e zjarrit, të ndihmuara dhe nga era, u përhapën me shpejtësi duke djegur dhe shkrumbuar plotësisht një sipërfaqe rreth 50 hektarësh me shkurre.
Shefi i Policisë Pyjore, Xhorxhi Goxhara, u shpreh për ATSH-në se, megjithë përpjekjet për ta dominuar, vatra e zjarrit u zgjerua dhe përfshiu një sipërfaqe të gjerë. Flakët rrezikuan dhe disa stane që ndodhen në zonë, të cilat, gjithsesi, nuk u përfshinë nga flakët. Goxhara, tha se vatra e zjarrit është pasojë e veprimeve të çobanëve të kësaj zone, të cilët synojnë të zgjerojnë hapësirat e kullotave.
Flakët erdhën fillimisht nga fshati Vodicë, rreth 5 km në lindje të kodrave të Shashicës, duke u favorizuar nga era e fortë.
Aktualisht vatra e zjarrit është nën kontroll./ch/
