Tiranë, 23 shtator, NOA – Kryesocialisti Edi Rama kërkon me çdo kusht që të ngrejë ngërçe dhe akuza të reja, me protesta të reja, të cilat kanë si qëllim vetëm bllokimin e reformave të vendit.
Kjo ka qenë akuza e ngritur nga ministrja e Integrimit Majlinda Bregu, sot në seancë plenare, drejt kreut të socialistëve duke e kritikuar atë për frymën negative që po shpërndan në lidhe me zbatimin e reformave integruese në vendin tonë.
Sipas saj, deklaratat e Partisë Socialiste për korrupsion ndaj figurave të larta demokrate, përfshirë këtu edhe veten e saj, nuk përbëjnë gjë tjetër, veçse përpjekjen dhe inatin e kreut të PS-së për arritjet aktuale të vendit.
"Ti, Edi Rama gënjen kur i thua shqiptarëve se proteston në këtë mirë të tyre por ti proteston kundër të mirës të tyre. Ti je burri pa burrni i kësaj qeverie dhe nuk ke kurajo të pranosh dhe po fillon një fushatë antishqiptare ndërkohë që të gjithë shqiptarët presin liberalizimin e vizave", theksoi më tej Bregu.
n.e/NOA
