Gjirokastër, 31 tetor, NOA, Update – Personi që transportonte nga Lazarati 100 kilogramë hashash ka tentuar të godasë me makinë punonjësit e policisë që janë përpjekur ta ndalojnë atë.
Policia ka konfirmuar për korrespodentin e Agjencisë NOA në Gjirokastër, faktin që drejtuesi i automjetit që transportonte 100 kilogramë ka thyer postbllokun e efektivave të policisë rrugore që ishte ngritur në fshatin Jorgucat.
Pas incidentit, drejtuesi i makinës tip “Hundai”, me targa fallso, Gj 20 35 A është larguar disa kilometra dhe e ka braktisur automjetin. Ngjarja ka ndodhur mbrëmjen e djeshme rreth orës 19:30.
Policia është njoftuar për mundësinë e kalimit të një sasi droge në zonën e Jorgucatit dhe për këtë qëllim ka ngritur dhe postblloqet.
Porsa ka parë postblloqet e policisë drejtuesi i makinës ka rritur shpejtësinë duke shpërthyer postobllokun e Policisë Kufitare dhe duke vënë në rrezik jetën e punonjësve të rendit.
Më pas efektivat e policisë janë vënë në ndjekje të automjetit, i cili vazhdoi lëvizjen në drejtim të Sarandës, ku në aksin rrugor Jorgucat - Sarandë në dalje të fshatit Jorgucat drejtuesi i automjetit ka braktisur automjetin dhe është larguar me vrap duke përfituar edhe nga errësira.
Policia është vënë në ndjekje të autorit. Ndërsa pas kontrollit të ushtruar në makinë u gjetën 4 çanta të mëdha shpine, të mbushura me pako në formë cilindrike ku brenda tyre kishte lëndë narkotike Mariuanë. Në secilën çantë kishte nga rreth 25 pako me peshë 1 kilogramë secila gjithsej 100 kilogramë .
Sipas policisë hashashi ka dalë nga fshati Lazarat me destinacion Sarandën e më pas Greqinë .
a.k/NOA
