Tiranë, 6 Nëntor, NOA - Mungesa e Gjykatës Administrative i shkakton me qindra e qindra milion euro të përvitshme dëm ekonomisë kombëtare dhe qytetarëve shqiptare. Dhe pavarësisht, se është i domosdoshëm miratimi sa më i shpejtë i saj, duke parë gjendjen e sotme krejt të pakënaqshme të përplasjeve shtet/biznes dhe qytetarë, drafti i tanishëm dhe pjesë të tjera legjislacioni në fuqi kanë nevojë për përmirësime të rëndësishme.
Ky fakt u theksua sot gjatë forumit akademik mbi përmirësimin e projekt-ligjit të Gjykatës Administrative, i cili u organizua nga Konfindustria në bashkëpunim me TBU/Tirana Business University, ku të pranishëm ishin përfaqësues profesionistë të zgjedhur nga Gjykata Kushtetuese, Gjykata e Lartë, e Apelit, Gjykata e Shkallës së parë, Autoriteti I Konkurencës, Këshilli i lartë i Drejtësisë, Prokuroria e Përgjithshme, bota akademike dhe universitare, përfaqësues të biznesit, etj.
Forumi ishte i pari i llojit të vetëm, i mbajtur në nivel akademik për ligjin e shumëpërfolur të Gjykatës Administrative duke shmangur politizimin e theksuar të deritashëm nga partitë politike.
Përfundimet e tij kanë rëndësi të posaçme për përmirësimin e draftit të paraqitur për miratim në Kuvendin e Shqipërisë si dhe për masat e nevojshme, që duhen ndërmarr për të përshtatur në frymën e tij dhe pjesë të rëndësishme të legjislacionit në fuqi.
Konkretisht, aty u përmend nevoja e krijimit të një seksioni të veçantë administrativ në Gjykatën e Lartë; shkurtimit kohor të procedurave të gjykimit në administrativ në Gjykatën e Lartë; zgjatja e afateve kohore të përcaktuara me ngritjen e padisë etj, të cilat përsëri kërkojnë miratim me shumicë të cilësuar votash në Kuvendin e Shqipërisë. Gjithashtu u debatua mjaft për kërkesën e paplotësuar të Konfindustrisë për 4- domosdoshmërinë e rekrutimit në masën fillestare deri në 30% si gjyqtare administrative të ekspertëve të caktuar sipas fushave të së drejtës administrative (kontabiliste, financiere, inxhiniere, etj.) me qëllim rritjen e cilësisë së gjykimit, shpejtësisë dhe sipas shembullit të vendeve të zhvilluara demokratike të BE.
Dokumenti përfundimtar i forumit, që do tu dërgohet vendimarrjes politike si dhe opinionit publik të së gjithë krahëve me qëllim përmirësimin, miratimin dhe funksionimin sa më të shpejtë të Gjykatës Administrative.
n.e/NOA
