Prishtinë, 7 nëntor, NOA - Avni Klinaku, kryetar i Lëvizjes për Bashkim, ka thënë se “iu kemi ofruar lëvizjes ‘Vetëvendosje’, gjithmonë duke ia njohur rolin udhëheqës, duke e njohur Albin Kurtin si lider dhe duke respektuar madje edhe emrin e lëvizjes ‘Vetëvendosje’ dhe këto kanë rezultuar, fatkeqësisht, pa sukses”.
Muaj më parë Avni Klinaku kishte paralajmëruar një koalicion parazgjedhor që do të lidhej midis subjekteve që kanë në program bashkimin e Kosovës me Shqipërinë. Midis tyre, edhe me lëvizjen “Vetëvendosje” të Albin Kurtit. Iniciativa për koalicionin me “Vetëvendosjen” është shpallur e dështuar.
Në një intervistë për “Kohën Ditore”, Klinaku, lider i Lëvizjes për Bashkim, ka treguar se çka e ka bërë të pamundur këtë koalicion. Ka folur për “vetëmohimin” e lëvizjes që ai drejton, por edhe për “gafat” e lëvizjes së Albin Kurtit. Ai ka shprehur drojën se pasojë e kësaj është shpërndarja e elektoratit që është pro bashkimit kombëtar.
Megjithëkëtë, ka shfaqur shpresën që me disa subjekte të tjera të dalë bashkërisht në zgjedhjet e 12 dhjetorit. Midis tyre, edhe me Listën për Shqipërinë Natyrale, që së fundi është themeluar në Shqipëri, e që do të shtrijë aktivitetin edhe në Kosovë. Pritjet e tij janë që së paku dy subjekte të mbërrijnë pragun prej 5 për qind dhe të bëhen pjesë e Kuvendit të Kosovës.
NOA
