Tiranë, 8 nëntor, NOA- “Një moment emocional dhe sublim, akti më i prekshëm që na bën të ndihemi evropianë dhe pjesë e denjë e këtij kontinenti të cilit ne i përkasim tërësisht”.
Me këto fjalë e ka përshëndetur gjatë një interviste televizive, ministri i Jashtëm Edmond Haxhinasto votimin pozitiv të pak minutave më parë nga Këshilli i Ministrave të Bashkimit Evropian për heqjen e vizave me Shqipërinë.
“Eshtë një moment reflektimi për të vlerësuar punën e jashtëzakonshme që është bërë në drejtim të lëvizjes së lirë, pa harruar as sakrificat e shumë shqiptarëve, të cilët e kanë patur Evropën dhe lëvizjen e lirë si një ëndërr të tyre, e cila do të bëhet realitet”, tha ndër të tjera ai.
Më tej, kryediplomati shqiptar vuri në dukje faktin se ka patur një konsensus të gjerë evropian për miratimin e heqjes së vizave me Shqipërinë, gjë që e tregoi edhe votimi në unanimitet i të gjithë ministrave të Brendshëm evropianë.
Në fund, ai tha se qeveria e integrimit, e cila erdhi në pushtet me premtimin e hapave para në këtë proces, tregoi se përmbushi një nga premtimet e saj kryesore.
n.e/NOA
