Tiranë, 15 Nëntor, NOA - Kryeministri Berisha zhvilloi sot një vizitë ngushëllimi në familjen e oficerit të policisë Pajtim Alistava, i cili humbi jetën pak ditë më parë si pasojë e një aksidenti automobilistik gjatë kryerjes së detyrës.
Duke i shprehur familjarëve ngushëllimet më të thella të tij për humbjen njeriut të tyre të dashur, kryeministri Berisha u shpreh se Pajtim Alistafa për kohën që shërbeu ishte shembullor dhe në emër të këtij shërbimi sakrifikoi jetën, duke i lënë familjarëve të tij nder të madh, por, natyrisht, edhe dhembje të pakompensueshme.
“Urojmë që të gjeni forcën ta përballoni këtë dhembje, pasi ajo është shumë e madhe. Ngushëllim mbetet emri dhe nderi i tij, pasi ai ju ka nderuar ju, familjen, shoqërinë dhe forcat e policisë”, u shpreh kryeministri.
Gjatë kësaj vizite, kryeministri Berisha shoqërohej nga drejtori i Përgjithshëm i Policisë së Shtetit, Hysni Burgaj.
n.e/NOA
