Tiranë, 17 Dhjetor, NOA – Shtimi i reshjeve të borës gjatë natës dhe mëngjesit të sotëm, ka shkaktuar bllokim të të gjitha komunave dhe akseve rrugore.
Sipas raportimeve që autoritetet përkatëse bëjnë për agjencinë e Lajmeve NOA, në Kukës rezultojnë të bllokuara komunat Bushtricë, Zapod, Golaj, Gjinaj; ndërsa në Tropojë të tilla janë komunat Margegaj, Lekbibaj.
Kurse në zonën e Dibrës, problematikë shënohen Qafa e Ulzës, Qafa e Buallit dhe janë izoluar komunat e Trebishtës, Martaneshit dhe Macukullit.
Por gjendja më e rënduar duket se paraqitet në zonën e Korçës, ku qarkullimi në të gjitha akset rrugore të saj, mësohet se bëhet me zinxhirë.
Por edhe në zonën e bregdetit, gjendja nuk paraqitet më e mirë, ku mjetet e kanë shumë të vështirë kalimin në Qafën e LLogarasë.
n.e/NOA
