Prishtinë, 18 mars, NOA - Drejtori i përgjithshëm i Policisë së Kosovës, Reshat Maliqi, priti sot në një takim ambasadoren e Turqisë në Kosovë, Songül Ozan, të cilës i ka shprehur falënderimin e tij për bashkëpunimin e mirë dhe kontributin që policia turke vazhdimisht ka dhënë në fushën e trajnimeve për Policinë e Kosovës.
Gjithashtu, ai theksoi edhe rolin pozitiv që stafi drejtues i ambasadës turke në Kosovë ka luajtur në krijimin e lidhjeve në mes të organizatave policore të dy vendeve.
Nga ana e saj, ambasadorja Songül Ozan, shprehu përkushtimin e shtetit turk për të përkrahur Policinë e Kosovës dhe u pajtua për përforcimin e bashkëpunimit në të ardhmen në mes të organizatave policore të të dy vendeve.
Policia e Turqisë ka ndihmuar Policinë e Kosovës në sferën e trajnimeve në shumë fusha si në hetimin e krimeve, krimeve kibernetike, njësive speciale, menaxhimit efektiv të policisë dhe në fushën e komunikimit.
n.e/NOA
