Tiranë, 2 maj, NOA – Ambasadori i OSBE-së në Tiranë, Eugen Wollfarth ka deklaruar sot se masat e marra nga policia për zgjedhjet e 8 majit janë në nivele të kënaqshme. Në takimin e zhvilluar sot me Drejtorin e Përgjithshëm të Policisë, Hysni Burgaj, Wollfarth ka theksuar se misioni që ai drejton do të jap asistencë për forcat e rendit në tetë maj.
“Policia është duke bërë përgatitje të shkëlqyera dhe ajo është e ndërgjegjshme që në këto zgjedhje duhet të kemi akses të plotë dhe zgjedhje të lira. Policia është e ndërgjegjshme se qytetarët kanë të drejtë të votojnë dhe janë të ndërgjegjshëm për të drejtat e njeriut. Prezenca e OSBE do të ndihmojë policinë për çështjen e komunikimit në disa zona të largëta të Shqipërisë”, tha Wollfarth.
Ai ka folur dhe për incidentet që kanë ndodhur gjatë fushatës, duke theksuar se është e rëndësishme që të vazhdojë fushatë e qetë.
“Është shumë e rëndësishme që situata të vazhdojë të mbetet e qetë dhe që qytetarët të ndjekin programet politike dhe të vazhdojnë të sillen të fokusuar tek paqja dhe qetësia”, tha ai.
a.k/NOA
