SHBA, 4 maj, NOA - Ish Presidenti amerikan, Xhorxh Bush, nuk e ka pranuar ftesën nga Presidenti aktual, Barak Obama, që së bashku ta vizitojnë “Zonën Zero” apo vendin ku janw shkatërruar ndërtesat binjake të enjten për të shënuar kështu vdekjen e liderit të Al Kaidës, Osama bin Laden. Gazeta Nju Jork Tajms ka cituar zëdhënësin e ish Presidentit, Dejvid Sherzer, duke thënë se Bush nuk do të marrë pjesë në atë vizitë.
Shtëpia e Bardhë nuk e ka konfirmuar ftesën si dhe nuk ka pranuar të komentojë në vendimin e Bushit.
Që nga koha kur është larguar nga Shtëpia e Bardhë, Bush, në përgjithësi ka qëndruar larg vëmendjes së opinionit.
Presidenti Obama pritet të vizitojë “Zonën Zero” ku më 11 shtator 2001, terroristët e Al Kaidës i sulmuan ndërtesat binjake të Qendrës Botërore Tregtare ndërsa planifikon të takohet edhe me familjarët e viktimave.
Bush, i cili gjatë kohës kur ishte President e kishte bërë ndjekjen e bin Ladenit prioritet, e ka uruar pasardhësin e tij për vdekjen e Osama bin Laden.
NOA
