Ish kryeprokurorja e Tribuanlit të Hagës, Karla del Ponte, ka thënë se ajo pret që tani të arrestohet edhe i aratisuri i fundit, Goran Hagjiq.
Në një intervistë dhënë të përditshmës së zvicrës, “Zontags Cajtung”, Del Ponte, ka thënë se kur e ka përfunduar mandatin e kryeprokurores së Hagës në vitin 2007, ka besuar se Hagjiq po fshihej në Serbi.
Sakaq, radio RFE informon se autoritetet e Serbisë e kanë rritur nivelin e sigurisë sot në Beograd, pasi qindra veta që kanë lidhje me organizatat ekstremiste, janë mbledhur në Beograd për të protestuar kundër arrestimit të Mlladiqit.
Aktivisti i partisë radikale serb, Slobodan Boziq, tregon arsyen pse janë mbledhur:
“Ratko Mlladiq është një komandant i ushtrisë së popullit serb, ndërsa arrestimi i tij është një turp i madhë për popullin e Serbisë dhe shtetin tonë. Ai është hero i popullit serb, ai e ka mbrojtur kombin tonë dhe për këtë arsye ne të gjithë duhet të dalim në rrugë për të tregur përkrahjen tonë për të”, tha Boziq.
