Prishtinë, 31 maj 2011, NOA- Presidentja e Kosovës, Atifete Jahjaga priti sot në takim Guvernatorin Howard Dean, ish kryetar i DNC-së, Komiteti Kombëtar Demokrat, dhe ish-kandidat për president në SHBA.
Gjatë takimit, Jahjaga tha se lidhja dhe miqësia mes Kosovës dhe SHBA-së është e thellë dhe e patundur. Ajo e vlerësoi lart mbështetjen e fuqishme të SHBA-së për lirinë, pavarësinë dhe demokracinë e Kosovës.
Më tej ajo garantoi se është plotësisht e përkushtuar që të punojë për funksionimin demokratik të institucioneve të Kosovës dhe që institucionet tona të jenë transparente dhe të përgjegjshme.
Ndër të tjera Jahjaga u shpreh se zgjedhjet e lira dhe demokratike janë themel i demokracisë dhe kusht i domosdoshëm për institucione të hapura dhe të përgjegjshme.
Nga ana e tij, guvernatori Dean, përgëzoi Presidenten për zgjedhjen e saj, si dhe theksoi rëndësinë e angazhimit të të gjitha institucioneve për ndryshimet kushtetuese dhe reformën zgjedhore.
a.y/NOA
