Tiranë, 23 qershor 2011, NOA- Kryeparlamentarja Jozefina Topalli gjatë ditës së sotme priti në një takim zëvendëskryeministren dhe ministren për Tregti dhe Industri të Kosovës Mimoza Kusari Lila.
Një ndër temat kryesore ku u përqendrua biseda mes tyre ishte përafrimi i legjislacionit mes Kosovës dhe Shqipërisë, kryesisht për sa i përket procedurave doganore dhe ekonomike.
Sakaq Topalli pas urimit të bërë ndaj mysafires për detyrën e re, vlerësoi faktin që gratë në Kosovë po përfaqësohen denjësisht në nivelet më të larta deri në Presidencë.
Nga ana e saj Kusari Lila i shprehu kryeparlamentares respektin për kontributin e saj duke shtuar se “çdo femër në Kosovë e sheh si model shumë pozitiv, punën tuaj në krye të Kuvendit të Shqipërisë”.
Më tej biseda u përqendrua edhe te Rruga e Kombit, ku u theksua fakti se përveç afrimit njerëzor kjo rrugë pati një efekt të drejtpërdrejt në rritjen e shkëmbimit ekonomik dhe krijimin e një hapësire më të gjerë të tregtisë në rajon e më tej.
Kryetarja e Kuvendit ofroi mbështetje të gjithanshme, veçanërisht në ekspertizën ligjore dhe shkëmbimit të përvojës në hartimin e miratimin e ligjeve me karakter ekonomik.
Sakaq ajo shtoi se përafrimi i legjislacionit mes dy vendeve është domosdoshmëri, veçanërisht në kuadër të përafrimit të legjislacionit me Bashkimin Europian.
Në vijim u vlerësua fakti që eksportet nga Shqipëria në Kosovë janë rritur në rreth 50 për qind sikundër ka edhe një rritje të ndjeshme të eksporteve të Kosovës drejt Shqipërisë.
a.y/NOA
