Prishtinë, 24 qershor 2011, NOA- Rizgjedhja e Behxhet Pacollit në krye të Aleancës Kosova e Re, pritet të jetë në unanimitet të plotë.
Ky fakt është komunikuar nga një njoftim i AKR-së ku thuhet se kryesia shpreh bindjen e thellë se në rast se Behxhet Pacolli do ta pranoj kandidimin që të rizgjidhet në krye të AKR-së, mbështetja do të jetë unanime nga të gjitha strukturat e AKR-së, përfshirë edhe mbështetjen nga të gjithë emrat e personaliteteve që janë përfolur këtë kohë si kandidat të mundshëm.
Më tej theksohet se lidhur me këtë kandidim është marrë edhe mendimi i ushtruesit të detyrës në postin e kryetarit të partisë, Rrahim Pacolli.
Ndër të tjera në njoftimin e AKR, thuhet se është Kuvendi Qendror ai që merr vendimin për kryetarin e partisë, por sqaron se strukturat e partisë janë kompakte, pavarësisht përfoljes në media të Behxhet Pacollit.
a.y/NOA
