Shkup, 25 qershor 2011, NOA - Parlamenti i Maqedonisë do të mbajë sot seancën e parë ku do të konstituohet përbërja e re parlamentare e dalë nga zgjedhjet e 5 qershorit.
Në rendin e ditës të kësaj seance të parë është zgjedhja e kryetarit të Parlamentit, zgjedhja e komisionit të verifikimeve, verifikimi i mandateve si dhe zgjedhja e anëtarëve të Komisionit për zgjedhje dhe emërime.
Siç është paralajmëruar sot pritet edhe zgjedhja e kryetarit të Parlamentit dhe se jozyrtarisht kjo detyrë do të vazhdojë t’i takojë VMRO-DPMNE-së.
Pas konstituimit të Parlamentit, Presidenti i vendit, Gjorgje Ivanov gjatë 10 ditëve të ardhshme do të duhet që t’i jap mandatin liderit të partisë që ka fituar në zgjedhje, në këtë rast VMRO-DPMNE-së për të formuar Qeverinë.
Më pas mandatari, Nikolla Gruevski në një afat prej 20 ditësh duhet të propozojë kabinetin e tij qeveritar.
Parlamenti i ri numëron 123 deputetë, pasi për herë të parë në karriget e institucionit legjislativ do të ulen edhe tre deputetë nga diaspora.
Në zgjedhjet e parakohshme parlamentare të 5 qershorit VMRO-DPMNE fitoi 56 deputetë, LSDM 42, BDI 15, PDSH 8 dhe RDK 2 deputetë.
INA/NOA
