Tiranë, 5 gusht 2011, NOA/Irma Toptani - Kalimi i Piramidës në pronësi të Kuvendit të Shqipërisë i hap dritën jeshile shembjes së saj dhe ndërtimit në po të njëjtin vend të kompleksit të ri parlamentar.
Ligji që parashikon transferimin e Qendrës Ndërkombëtare të Kulturës “Pjetër Arbnori” nga inventari i Ministrisë së Kulturës në pronësi të kuvendit pritet të hyjë në fuqi pas botimit në fletoren zyrtare.
Kjo pasi Presidenti i Republikës Bamir Topi nuk e ktheu mbrapsht ligjin, por e kaloi atë në heshtje duke i dhënë fuqi vepruese atij menjëherë pas botimit në fletoren zyrtare.
Me shumë gjasë ky ligj do të hyjë në fuqi para muajit shtator, çka i hap rrugën diskutimit të një tjetër projektligji që do të përcaktojë destinacionin e ndryshuar të sheshit dhe procedurat që do të ndiqen për ndërtimin e kompleksit të ri parlamentar.
Debatet për prishjen e Piramidës kanë vazhduar gjatë pasi një grup shoqatash dhe personalitetesh, kanë depozituar në presidencë një peticion të firmosur nga 6100 qytetarë kundër prishjes së saj.
Ndërtimi i kompleksit të ri parlamentar është shpallur nga mazhoranca si një nga projektet më madhore të qeverisë në kuadër të kremtimit të 100-vjetorit të pavarësisë së Shqipërisë.
Mbetet për tu parë nëse me fillimin e sesionit të ri parlamentar, mazhoranca do të përshpejtojë procedurat për realizimin e këtij projekti pasi koha e mbetur deri në vitin 2012 është e paktë.
mit/NOA
