Prishtinë, 22 gusht 2011, NOA - Diplomati Philip Reeker do të përfaqësojë Qeverinë amerikane në dialogun mes Kosovës dhe Serbisë në Bruksel.
Lajmin e kanë bërë publik mediat kosovare.
Në procesin e bisedimeve më parë ishte përfshirë ish-zëvendës/Ndihmëssekretari amerikan i shtetit Thomas Countryman, por ky është nominuar për një post tjetër nga Presidenti Barack Obama.
Ndërkaq, ekipet negociatore të Kosovës, Serbisë dhe BE-së nuk kanë ndryshime.
Edita Tahiri do të udhëheqë delegacionin e Kosovës, kurse Borisllav Stefanoviç do të kryesojë sërish delegacionin serb. Pavarësisht zhvillimeve në Veri dhe përplasjeve mes politikanëve të Kosovës dhe Serbisë, raundi e ri i dialogut do të vazhdojë në Bruksel, më 2 shtator.
Vazhdimi i këtij dialogu nuk kushtëzohet as me zbatimin e plotë të marrëveshjes së KFOR-it me palët që nënkupton heqjen e të gjitha barrikadave në Veri.
Me gjithë pakënaqësinë e Prishtinës me sjelljen e negociatorit serb, që shëtiste nga një barrikadë në tjetrën gjatë rebelimit të serbëve në Veri dhe i inkurajonte ata të mos lëshojnë pe, deri më tani pozita e tij si udhëheqës i bisedimeve në emër të Serbisë nuk ka lëvizur.
As në kampin e ndërmjetësve të Bashkimit Europian nuk është njoftuar për ndonjë ndryshim.
Ndërmjetës i dialogut Prishtinë-Beograd vijon të mbetet Këshilltari i Baroneshës Ashton, britaniku Robert Cooper.
Pranë tij, do të jetë i ulur edhe Pierre Mirel, drejtori për Zgjerimin në Komisionin Europian, Përfaqësuesi i BE-së në Prishtinë, Fernando Gentilini, si dhe një diplomate e BE-së nga Greqia.
KD/mit/NOA
