Cesano Maderno (Itali), 28 Gusht 2011 NOA - Shtatë familje, mes tyre dhe një shqiptare, kanë mbetur pa banesë si pasojë e një zjarri. Ngjarja ka ndodhur në qytetin Cesano Maderno të Italisë, ku flakët dëmtuan pallatin e vjetër në rrugën “De Amicis” duke e bërë atë të pabanueshëm.
Drama duket se është më e rëndë për familjen shqiptare. Të gjithë të tjerët janë strehuar te të afërmit të tyre, ndërkohë që familja e shqiptarit Armand Toma, ka marrë vesh për zjarrin vetëm pasi është kthyer nga pushimet nga Shqipëria.
Duke folur mbi ngjarjen e trishtë që mësoi, 30-vjeçari Toma pohon se ai ka një vajzë të vogël dhe tashmë i duhet të gjejë një strehë për familjen e tij.
Komuna e Cesano Maderno për arsye sigurie ka vendosur që të shtatë banesat të mos përdoren deri në riparimin e plotë të tyre. Pronarët e tyre mund të hyjnë vetëm pasi të jenë bërë të gjitha riparimet e duhura.
Zjarri, që për pak desh shkaktoi fatkeqësi, ra në një prej banesave ku jetonte një pakistanez. Ndërkohë që dëmi është shkaktuar për të gjitha familjet dhe nuk dihet nëse kompanitë e sigurimeve do të mbulojnë shpenzimet. Në total janë rreth 40 persona që kanë mbetur pa strehë.
e.t/NOA
