Nju Jork, 18 shtator 2011, NOA – Në Sesionin e 66-të të Asamblesë së Përgjithshme të OKB-së, Nju Jork do të marrë pjesë në delegacionin zyrtar të kryesuar nga kryeministri Sali Berisha edhe kryediplomati shqiptar Edmond Haxhinasto. Zyra e shtypit e Ministrisë së Punëve të Jashtme bën me dije se axhenda e zëvendëskryeministrit dhe ministrit të Punëve të Jashtme përmbledh një sërë takimesh të nivelit të lartë, si dhe pjesëmarrjen në aktivitete të rëndësishme, si psh, Forumi i Parë i Investimeve Shqipëri-SHBA. Ministri Haxhinasto do të kryesojë Takimin e Kartës së Adriatikut, me përfaqësues të lartë nga vendet e Rajonit dhe SHBA-ve. Fokusi kryesor i takimeve dhe aktiviteteve në kuadër të punimeve të Sesionit të 66-të të OKB-së, do të jetë kryesisht forcimi i bashkëpunimit të Shqipërisë me këtë Organizatë dhe reforma e saj; pjesëmarrja aktive e Shqipërisë në veprimtaritë e OKB-së në fushën e sigurisë dhe paqes, në atë të çarmatimit, në çështjet social-ekonomike, të së drejtës ndërkombëtare si dhe të të drejtave të njeriut. Një vëmendje të veçantë, gjatë punimeve të Asamblesë së Përgjithshme, do t’i kushtohet Kosovës dhe lobingut për rritjen e njohjeve ndërkombëtare të saj. mit/NOA
