Gjirokastër, 13 tetor 2011, NOA – Nën akuzën e trafikut ndërkombëtar të drogës të mbetur në tentativë është arrestuar në Gjirokastër një student i Universitetit “Eqerem Çabej” dhe u shpallën në kërkim tre të tjerë. Trafikantët u zbuluan si rezultat i një operacioni kundër drogës, gjatë të cilit u sekuestruan 75 kilogramë marijuanë në vendin e quajtur gryka e Bogazit përballë fshatit Radat të rrethit Gjirokastër në kufirin e gjelbër me shtetin Grek. Gjatë aksionit u kap studenti 21-vjeçar Indrit Muliu, lindur dhe banues në Dibër, student në vitin e tretë dega Gjuhë – Letërsi në Universitetin “Eqerem Çabej”. Studenti bashkë me tre persona të tjerë të shpallur në kërkim ishte pjesëtar i grupit që po transportonte katër çanta me lëndë narkotike në drejtim të shtetit grek, po i ndaluar në momentet e fundit nga policia kufitare. Indrit Muliu u kap në mjediset e konviktit të Universitetit “Eqerem Çabej” në Gjirokastër. Sipas policisë rajonale ai do të transportohet në dhomat e paraburgimit në Drejtorinë e Policisë së qarkut të Tiranës pasi do të gjykohet nga Gjykata e Krimeve të Rënda. mit/NOA
