Zagreb, 26 tetor 2011, NOA- Presidentja e Kosovës, Atifete Jahjaga, takoi sot Presidentin e Kroacisë Ivo Josipoviç, gjatë qëndrimit të saj në Zagreb, ku po merr pjesë në konferencën ndërkombëtare për rolin e gruas në rritjen dhe zhvillimin ekonomik të Evropës Juglindore, të organizuar nga Departamenti amerikan i Shtetit. Gjatë këtij takimi Jahjaga vlerësoi marrëdhëniet e Kosovës me Kroacinë dhe tha se është i nevojshëm thellimi i mëtejshëm i bashkëpunimit mes dy shteteve. Presidentja Jahjaga tha se Bashkimi Evropian nuk do të jetë i kompletuar pa përfshirjen e të gjitha shteteve të Ballkanit Perëndimor. Nga ana e tij Presidenti i Kroacisë, Ivo Josipoviç, i shprehu përkrahjen e vendit të tij për axhendën evropiane të Kosovës. Josipoviç theksoi rëndësinë e thellimit të bashkëpunimit mes Kroacisë dhe Kosovës në të gjitha fushat, veçanërisht në fushën e politikës, ekonomisë etj. Ai tha se Kroacia mund ta ndihmojë Kosovën në procesin e integrimeve evropiane, duke u nisur edhe nga përvojat që shteti i tij ka kaluar në këtë rrugë. a.y/NOA
