Romë, 16 nëntor 2011, NOA/Albana Qehajaj – Pas një takimi të gjatë më presidenti Napolitani, profesor Mario Monti ka thyer pritjen dhe ka vendosur të pranojë postin e kryeministrit të ri të Italisë, pas dorëheqjes së Silvio Berluskonit.
Monti ka prezantuar publikisht edhe përbërjen e kabinetit të ri qeveritar, ku bie në sy fakti se çështjet ekonomike i janë lënë në dorë teknikëve duke lënë mënjanë emra politikanësh. Kështu, vetë kryeministri i ri Mario Monti, i njohur për kontributin e tij në ekonominë evropiane, do të jetë edhe ministri i ri i ekonomisë, ndërsa kabinetit pritet të bëjë betimin në Presidencë sot në orën 17.00. Ajo çka bie në sy është besimi që Monti u ka dhënë ministreve femra për poste me rëndësi si drejtësia, apo ministria e brendshme.
Agjencia NOA.al sjell edhe përbërjen e qeverisë Monti:
1.Mario Monti, kryeministër dhe ministër i ekonomisë
2. Anna Maria Cancellieri, ministër i brendshëm
3. Paola Severino, ministër i drejtësisë
4. Giampaolo Di Paola, ministër i mbrojtjes
5. Corrado Passera, ministër i zhvillimit ekonomik
6. Giulio Terzi di Sant'Agata, ministër i jashtëm
7. Francesco Profumo, ministër i arsimit
8. Lorenzo Ornaghi, ministër i kulturës
9. Mario Catania, ministër i bujqësisë
10. Renato Balduzzi, ministër i shëndetsisë
11. Enzo Moavero Milanesi, ministër për marrëdhëniet me BE
12.Elisa Fornero, ministre e punës
13. Corrado Clini, ministër i mjedisit
14. Piero Gnudi, ministër i turizmit dhe sportit
15. Piero Giarda, ministër për marrëdhëniet me Parlamentin
Po kështu, Monti ka emëruar Antonio Catricalà në postin e nënsekretarit të Këshillit të Ministrave.
Kush është kryeministri i ri i Italisë?
Mario Monti, është një ekspert shumë i respektuar i ekonomisë ndërkombëtare. Ai është cilësuar si një person i matur dhe i rezervuar, pothuajse e kundërta e Silvio Berluskonit, një manjat i prirur për sjellje të bujshme dhe për t’u vendosur në qendër të vëmendjes, të cilin ai do të zëvendësojë.
Monti drejton universiteti prestigjioz Bocconi të Milanos. Ai ka siguruar mbështetjen e një grupi të gjerë bankierësh, politikanësh dhe analistësh ndërkombëtarë për aftësitë e tij si negociator dhe ekonomist, megjithëse nuk ka pasur asnjëherë detyrë politike si i zgjedhur. Zoti Monti u lind në qytetin verior italian të Varezes. Ai u diplomua në vitin 1965 nga Universiteti Bokoni i Milanos që konsiderohet djepi i përgatitjes së elitës ekonomike të Italisë. Ai shkoi për studime të mëtejshme në Universitetin Jellë dhe u përgatit nën ekonomistin nobelist amerikan Xhejms Tobin, i cili ka qënë një nga këshilltarët ekonomikë të presidentit Xhon Kenedi. Zoti Monti ka drejtuar Universitetin Bokoni që nga viti 1994, pikërisht atë vit që manjati i medias Berluskoni erdhi në pushtet. a.q/NOA
