Uashington, 26 nëntor 2011, NOA – Shtetet e Bashkuara të Amerikës nisën sot drejt planetit Mars, sondën “Curiosity” (Kuriozitet), roboti më i sofistikuar i hedhur ndonjëherë në hapësirë për të zbuluar deri në fund a ka ekzistuar ndonjëherë apo mundet të ekzistojë jetë në planetin e kuq, raporton agjencia e lajmeve NOA.al.
Misioni u nis me përpikmëri nga baza hapësinore amerikane në Kepin Canaveral në shtetin Florida, me një raketë “Atlas V”, e njëjta me të cilën, u hodhën në hapësirë sondat për njohjen e planetit të kuq në orbitë, që ndodhet aktualisht në Mars.
Misioni i ri hapësinor i NASA-s, për të cilin janë harxhuar plot 2,5 miliard dollarë është cilësuar si më ambiciozi i lëshuar ndonjëherë në Mars.
Anija “Curiosity” është e paprecedentë në llojin e saj.
Ajo peshon 9 kuintal, përfshin 80 kg pjesë shkencore, është e gjatë 3 m, dhe ka përmasat e një automjeti të vogël, por gjigant, krahasuar me dy sondat e tjera, që ndodhen aktualisht në sipërfaqen e planetit të kuq, si ajo “Spirit” dhe “Opportunity”, të gjata një metër e gjysmë dhe që peshojnë 174 kg, bashkë me 6,8 kg mjete shkencore.
“Curiosity” pritet të ulet në Mars në 5 gusht të vitit 2012.
mit/NOA
