Berlin, 13 dhjetor 2011, NOA - Ish-kancelari gjerman Helmut Kohl ka vlerësuar përpjekjet e popullit të Kosovës për shtetin e tyre të ri. Deklarata e Kohl u bë gjatë një takimi pritës me ambasadorin e Kosovës në Gjermani, Vilson Mirdita. Ky i fundit zhvilloi një vizitë private në shtëpinë e ish-kancelarit të mirënjohur gjerman në qytetin e Ludvigshafen.
Ambasadori Mirdita ka theksuar se ka arritur që të dëgjojë nga Kohl analizën mbi gjurmët e lëna në historinë moderne të kombit gjerman, bashkimin e dy Gjermanive, por edhe për politikat aktuale që po udhëheq BE.
Kohl ka trajtuar edhe çështjen e Kosovës duke dhënë vlerësimet dhe sugjerimet e tij mbi rrugën që duhet ecur vendi.
Kohl ka vlerësuar lartë përpjekjet e popullit të Kosovës për të qenë i lirë dhe për të ndërtuar shtetin demokratik. Ish-kancelari gjerman ka përshëndetur politikat që po zhvillon vendi në përmbushjen e detyrimeve për të qenë pjesë e familjes evropiane, por nga ana tjetër ka drejtuar kritika mbi politikat e zgjerimit të Evropës së bashkuar, duke shtuar se vendet e Ballkanit perëndimor që moti duhej të ishin pjesë e familjes evropiane.
Kohl ka paralajmëruar se së shpejti me gjithë dëshirë do të kishte dashur të vizitonte Kosovën. Në këtë takim ka marrë pjesë edhe deputeti i CDU-së në Bundestag, Philip Missfelder.
NOA
