Si rezultat i bashkëpunimit dhe shkëmbimit në kohë të informacionit ndërmjet Zyrës Qendrore Interpol Tirana dhe Interpol Roma Itali, u bë e mundur gjetja dhe arrestimi i personit në kërkim ndërkombëtar.
- Jetmir Llani, 33 vjeç, lindur në fshatin Shpërdhet të Rrethit Kurbin.
Shtetasi Jetmir Llani ishte shpallur në kërkim ndërkombëtar si autori i dyshuar i ngjarjes së ndodhur më datë 4 nëntor në Mamurras, ku mbeti i vrarë shtetasi Gentjan Shkreta dhe u plagos shtetasi Aurel Shkreta.
Arrestimi i të kërkuarit Jetmir Llani u krye nga forcat policore italiane në Firence të Italisë.
I kërkuari Jetmir Llani dyshohet për kryerjen e veprave penale vrasje me paramendim e kryer në bashkëpunim dhe armëmbajtje pa leje, vepra penale këto të parashikuara nga nenet 78, 25 e 278 të Kodit Penal.
Në ngarkim të këtij shtetasi Gjykata ka caktuar masën e sigurisë “Arrest në burg”.
Ky shtetas është në pritje të kryerjes së procedurave të ekstradimit në drejtim të Shqipërisë, me qëllim vënien e tij para organeve të drejtësisë.
