Goditet një rast trafiku lëndësh narkotike nga Policia Kufitare Sarandë
Strukturat e Policisë Kufitare Sarandë, bazuar në informacionet e grumbulluara, mbrëmë rreth orës 01.00’, organizuan operacionin për goditjen e një rasti trafiku lëndësh narkotike në kufirin e gjelbër ndërmjet Shqipërisë dhe Greqisë.
Megjithë kushtet e vështira të motit, strukturat e policisë kufitare Sarandë, në sajë të ndjekjes së vazhdueshme, bënë të mundur kapjen e shoqërimin e 3 personave të dyshuar, si dhe sekuestrimin e mjetit me të cilin ishte bërë transportimi i lëndës narkotike në zonën Çiflik -Katajeto.
Ndëkohë si rezultat i shkëmbimit të informacionit me autoritetet policore greke, u bë e mundur që në territorin grek të gjenden dhe sekuestrohen rreth 141 kg marijuanë.
Ndaj tre shtetasve të sipërpërmendur aktualisht po kryhen veprime procedurale nga strukturat e Drejtorisë së Policisë së Qarkut Vlorë.
