Nga Zyra Qëndrore Kombëtare Interpol Tirana, mbrëmë u krye ekstradimi nga Londra, Britani e Madhe, drejt vendit tonë i shtetasit shqipëtar Andi Idriz Bardhoshi, vjeç 39, nga Durrësi.
I ekstraduari ishte shpallur në kërkim ndërkombëtar, pasi Gjykata e Rrethit Gjyqësor Durrës, me vendimin Nr. 56, datë 08.03.2000, e ka dënuar këtë shtetas me 18 vjet burg në mungesë, për kryerjen e veprës penale të “Vrasjes me paramendim“ e kryer në bashkëpunim dhe armëmbajtjes pa leje, parashikuar nga nenet 78, 22 dhe 278/2, të Kodit Penal.
Ngjarja për të cilën ky shtetas është deklaruar fajtor nga organet e drejtësisë ka ndodhur më datë 14.09.1997, rreth orës 21:00, ku shtetasi Andi Bardhoshi në bashkëpunim me shtetasin Helidon Becka, kanë qëlluar me armë zjarri në drejtim të shtetasit Alfred H., duke e vrarë atë.
Si rezultat i bashkëpunimit të Interpol Tiranës me Interpol Londrën, në datën 03.05.2012, shtetasi Andi Bardhoshi, është arrestuar në qytetin e Londrës/Britani e Madhe, me qëllim ekstradimi drejt vendit tonë.
Në aeroportin “Nënë Tereza“, në Rinas, ky shtetas i është dorëzuar përfaqësuesve të Drejtorisë së Përgjithshme të Burgjeve.
