Tiranë, 23 prill, NOA - Edhe në seancën e sotme plenare, ashtu si në atë të fundit, opozita pritet të vijojë bojkotimin e saj në emër të zgjidhjes së çështjes së kartave të identitetit.
Ndërkaq, në këtë seancë, do të vendoset edhe "fati" i imunitetit të deputetit të grupit parlamentar "E ardhmja për Integrim", Nikollaq Neranxi, për të cilin është caktuar të votohet sot nga deputetët pas një vendimi të mbërritur nga organi i akuzës.
Sipas të dhënave paraprake, parashikohet që në punimet e sotme të parlamentit nga opozita të jenë të pranishëm vetëm një përfaqësi e socialistëve të cilët do t'u rikujtojnë edhe njëherë deputetëve të mazhorancës se ata nuk do të marrin pjesë në seancat plenare, deri në realizimin e kërkesës për marrje të kartave të identitetit falas. Opozita u largua që të enjten e kaluar nga salla e Kuvendit për shkak të një kërkese të tillë e cila sipas saj, nuk po gjen përgjigje nga mazhoranca.
n.e/NOA
